Doğum gününüz mübarək, ölümsüzlər! Featured

Qardaşı ilə çiyin-çiyinə vətənin müdafiəsinə qalxan qəhrəman: Şəhid Səid Bayramov

 

Murad Vəlixanov,

"Ədəbiyyat və incəsənət" portalının İncəsənət şöbəsi

 

Azərbaycanın ərazi bütövlüyü uğrunda canını fəda edən gənc qəhrəmanlar sırasında Səid Eldəniz oğlu Bayramovun özünəməxsus yeri var. Uşaqlıq illərindən hərb sənətinə böyük maraq göstərən və 44 günlük Vətən müharibəsində qardaşı ilə birlikdə ön cəbhəyə yollanan Səid döyüş meydanında nümayiş etdirdiyi cəsarətlə adını şanlı zəfər tariximizə yazdırıb.

 

Həyatı, təhsili və idman marağı

Səid Eldəniz oğlu Bayramov 1999-cu il noyabrın 20-də Kürdəmir rayonunun Çöl-Ərəb kəndində dünyaya göz açıb. 2006-2017-ci illərdə şəhid Əkbər Şəmiyev adına Çöl-Ərəb kənd tam orta məktəbində təhsil alıb. Məktəb illərində hərbçi olmaq arzusu ilə Cəmşid Naxçıvanski adına Hərbi Liseyə qəbul olunmağa cəhd göstərib, eyni zamanda bir müddət kikboksinq idman növü ilə məşğul olub.

2018-ci ilin yanvar ayında müddətli həqiqi hərbi xidmətə yollanıb. Gəncə şəhərində andiçmə mərasimindən sonra Qazax rayonunun Dəmirçilər kəndində yerləşən hərbi hissədə - Hava Hücumundan Müdafiə Qüvvələrinin sıralarında, düşmənlə üzbəüz təmas xəttində xidmət edib. Nümunəvi xidmətinə görə komandanlıq tərəfindən dəfələrlə fərqlənmə təltiflərinə layiq görülüb. 2019-cu ilin iyulunda hərbi xidmətini başa vurduqdan sonra Bakı şəhərində çalışıb. Şəhidimiz subay idi.

 

Vətən müharibəsində döyüş yolu və şəhadəti

2020-ci il sentyabrın 27-də Ermənistan silahlı qüvvələrinin təxribatlarına qarşı əks-hücum əməliyyatı başlayanda Səid Bayramov böyük qardaşı Əli ilə birlikdə könüllü olaraq cəbhəyə yollanıb. Cəbhənin müxtəlif istiqamətlərində döyüşən qardaşlardan Səid əvvəlcə Murovdağ silsiləsi uğrunda gedən ağır döyüşlərdə iştirak edib.

 

Daha sonra Füzuli, Cəbrayıl, Xocavənd, Qubadlı və Zəngilan rayonlarının işğaldan azad olunması əməliyyatlarında böyük rəşadət göstərərək Şuşa istiqamətinə qədər irəliləyib. Səid Bayramov 2020-ci il noyabrın 1-də Şuşa rayonu (Daşaltı kəndi) istiqamətində döyüş tapşırığını yerinə yetirərkən qəhrəmancasına şəhidlik zirvəsinə ucalıb. O, noyabrın 5-də doğulduğu Kürdəmir rayonunun Çöl-Ərəb kənd qəbiristanlığında böyük izdiham və ehtiramla torpağa tapşırılıb.

 

Təltifləri və xatirəsi

Azərbaycan Respublikasının Prezidenti İlham Əliyevin müvafiq sərəncamları ilə əsgər Səid Eldəniz oğlu Bayramov ölümündən sonra aşağıdakı medallarla təltif edilib:

"Vətən uğrunda" medalı. Azərbaycanın ərazi bütövlüyünün təmin edilməsi zamanı vəzifə borcunu şərəflə yerinə yetirdiyinə görə.

"Cəsur döyüşçü" medalı. Döyüş əməliyyatlarında şəxsi igidlik və şücaət göstərdiyinə görə.

"Füzulinin azad olunmasına görə" medalı. Füzuli rayonunun işğaldan azad edilməsi uğrunda döyüşlərdə iştirakına görə.

"Xocavəndin azad olunmasına görə" medalı. Xocavənd istiqamətində aparılan döyüş əməliyyatlarında fərqləndiyinə görə.

"Şuşanın azad olunmasına görə" medalı. Azərbaycanın mədəniyyət paytaxtı Şuşanın azad edilməsi uğrunda göstərdiyi qəhrəmanlığa görə.

 

Doğulduğu Kürdəmir rayonunun Çöl-Ərəb kəndində qəhrəmanımızın əziz xatirəsini əbədiləşdirmək məqsədilə xatirə bulağı inşa edilərək sakinlərin istifadəsinə verilib.

 

“Ədəbiyyat və incəsənət”

(20.11.2026)

Sayt Azərbaycan Respublikası Mədəniyyət Nazirliyi tərəfindən 2024-cü ildə “Qeyri-hökumət təşkilatları üçün qrant müsabiqəsi” çərçivəsində Azərbaycan Ədəbiyyat Fondunun həyata keçirdiyi “Yeniyetmə və gənclərdə mütaliə mədəniyyətinin formalaşdırılması” layihəsinin tərəfdaşı olaraq yenilənmiş, yeni bölmələr əlavə ediımiş, layihənin təbliği üzrə funksional fəaliyyət aparılmışdır.