Azərbaycan professional musiqi məktəbinin banisi, dahi bəstəkar Üzeyir Hacıbəylinin anadan olmasının 140 illiyi və Milli Musiqi Günü münasibətilə Almaniyanın Bremen şəhərində “Şərqdən gələn səs” adlı möhtəşəm musiqi proqramı təqdim olunub.

yat və incəsənət” portalı AzərTAC-a istinadən xəbər verir ki, Azərbaycanın Almaniyadakı səfirliyinin və Almaniyadakı Azərbaycan Mədəniyyət Mərkəzinin təşkilatçılığı ilə keçirilən tədbir Bremendə tarixi-memarlıq baxımından əhəmiyyətli “Unser Lieben Frauen Kirche - Christophus” salonunda baş tutub.

Konsertdə azərbaycanlı musiqiçi Tural İsmayılovun rəhbərlik etdiyi “Anima Şirvani” ansamblı və bremenli ifaçılar səhnəni bölüşərək Şərq və Qərb musiqi ənənələrinin möhtəşəm sintezini təqdim ediblər. Proqramda Üzeyir Hacıbəylinin əsərləri ilə yanaşı, dünya musiqisinin nəhəngi İohan Sebastyan Baxın kompozisiyaları da səsləndirilib. Musiqinin sehrli dili vasitəsilə mədəniyyətlərarası dialoq qurulub, dinləyicilərə bənzərsiz musiqili anlar bəxş edilib. Səsləndirilən əsərlər Şərqin zəngin melodiyalarını Avropa klassik musiqisinin dərin ahəngləri ilə birləşdirərək tamaşaçılara yüksək estetik zövq yaşadıb.

Tədbirin əsas məqsədi görkəmli bəstəkar Üzeyir Hacıbəylinin bənzərsiz yaradıcılıq irsini beynəlxalq miqyasda tanıtmaq, Azərbaycanın zəngin musiqi irsini beynəlxalq auditoriyaya daha geniş təqdim etmək olub.

“Ədəbiyyat və incəsənət”

(22.09.2025)