Sərtyel,

“Ədəbiyyat və incəsənət” portalının Gülüş klubu üzrə növbətçisi

“Gülüş klubu”nun devizi dəyişməz olaraq qalır: “Hərdən güldürürük, hərdən də düşündürürük”.

Bu gün menyuda iki elan və bir ləzgi lətifəsi vardır.

A

Elanlar lövhəsi

Əlləri 20 saniyə yumaq düzgün deyil. Əlləri ən azı 20 dəqiqə yumaq lazımdır.

 (Su Kanalı İdarəsi)

 ***

Bugatti avtomobilinin salonu xalqımız üçün yay sürprizi təklif edir. Belə ki, 2026-cı il Bugatti Veyron avtomobilindən iki ədəd alan kəslərə bir ədəd brelok hədiyyə edilir.

Xatırladırıq ki avtomobilin qiyməti 1200000 manatdır.

(Buğattinin distrübüteri Asif 88 şirkəti)

B

Lətifə saatı

Bir gün bir ləzgi əlində bıçaq məscidə girir:

-- Millət, içinizdə müsəlman olan var? - deyə bağırır.

Hamı susur. Ancaq yaşlı bir kişi özünə ar bilib qalxır:

-- Mən varam, - deyir.

Ləzgi qoca kişiyə “Bir dəqiqə çölə gəlin” deyərək qoluna girib onu məsciddən çıxarır. Bir az qabaqda hasara bağlı bir qoyunun yanına gəlib deyir:

-- Ağsaqqal, bu qurbanı kəsməyə kömək ol, İslam, qaydalarına uyğun kəsək. Mənə qibləni göstər və qoyunun ayaqlarını möhkəm tut.

Ləzgi qoyunu kəsməyə başlayar. Yaşlı kişinin əli-ayağı əsdiyi üçün qoyunun ayağı əlindən çıxır, hər tərəf qan olur.

Ləzgi narazı halda başını bulayıb deyir:

-- Ağsaqqal, tək gücün çatmır, gedim məsciddən bir müsəlman da çağırım.

Ləzgi əlində qanlı bıçaq üst-başı qan içində məscidə girərək qışqırır:

-- İçinizdə başqa bir müsəlman varmı?

Ləzginin qoca kişini aparıb doğradığını düşünən millətdən səs çıxmır. Bu dəm hamı dönüb mollaya baxır.

Molla cəld camaata deyir:

-- Nə baxırsınız, iki rikət namaz qıldıq deyə müsəlmanmı olduq!?

Sonra da üzünü ləzgiyə tutur:

-- O müqəddəs Məryəmə and olsun, burda bir müsəlman var idi, onu da sən bayaq apardın.

“Ədəbiyyat və incəsənət”

(10.08.2026)