Nigar Həsənzadə,

"Ədəbiyyat və incəsənət" portalının Xəbərlər və Təqvim şöbəsi

Azərbaycan Respublikasının Mədəniyyət Nazirliyinin dəstəyi ilə Dünya Gənc Türk Yazarlar Birliyinin təşkil etdiyi "Ədəbi irsimiz - ədəbi gəncliyimiz" adlı görüş keçirilib.

Dünya Gənc Türk Yazarlar Birliyinin sədri İntiqam Yaşar ustad qonaqları, müəllifləri və gəncləri salamlayaraq tədbiri açıq elan edib. Daha sonra layihə haqqında məlumat verən İntiqam Yaşar bu görüşün layihənin sonuncu görüşü olduğunu bildirib. O, həmçinin qeyd edib ki, sonuncu görüşün özəlliyi ondan ibarətdir ki, tədbir çərçivəsində "Ədəbi irsimiz, ədəbi gəncliyimiz" kitabının təqdimatı da keçiriləcək.

Daha sonra söz Türk Edebiyatı Vakfı Yönetim Kurulu Başkanı Serhat Kabaklıya verilib. Serhat Kabaklı qonaqları salamlayaraq layihənin əhəmiyyətindən və Türk dünyasının birliyindən bəhs edib.

Serhat Kabaklıdan sonra söz alan DGTYB Məsləhət Şurasının sədri Əkbər Qoşalıda layihə ilə bağlı fikirlərini bölüşüb. Qeyd edib ki, bu sayaq layihələr həm ədəbi irsimizin tanıdılmasında, həm də gənc yazarlarımızın təbliğində böyük rol oynayır.

Daha sonra söz yazıçı-publisist Məmməd Oruca verilib. Məmməd Oruc gənclərlə bir arada olduğu bu layihədə iştirak etməkdən məmnunluğunu ifadə edərək təşkilatçılara təşəkkür edib.

Çıxışlar arasında poeziyaya da yer verilib. Qiraətçi Ayna Səsin, eləcə də Səddam Laçın və Banu Muharrem kimi gənc şairlərin ifasında şeirlər yenidən canlanıb.

Tədbir sonda təltifetmə mərasimi və kollektiv xatirə şəklinin çəkilməsi ilə yekunlaşıb.

“Ədəbiyyat və incəsənət”

(08.06.2026)